الداتا انالتكس كما لم تعرفها من قبل

الداتا انالتكس كما لم تعرفها من قبل!!

بـالكمّ بالنوع .. بــالسمّ بالقتال  

بعد ما اتكلمنا عن الداتا في المقدمة اللي فاتت دي باسلوب مبسّط شويّة واعتقد اغلب اللي قرأ او بيقرأ دلوقتي او لسه هيقرأ عن الداتا انالتكس عموماً هيعتقد ان الموضوع سهل وبسيط وانه مش مستاهل كل البروباجاندا اللي عليه دي صح؟ خلوني اصدمكم شويتين في الميل ده بقى بشوية تفاصيل هنتعمّق سوا شوية في الموضوع .. لو مش مركّز او مش فايق يا تقوم وتقرأ الميل بعدين او تقوم تجيبلك كوباية قهوة حلوة كده وتيجي تقراه بتمعّن.

عارف انك مستني ادوات تحليل البيانات

طبعاً عارف انك مستني تعرف ايه الادوات والتولز المستخدمة في الداتا انالتكس .. خليني اقولك مع تطوّر الطلب على الداتا انالتكس ظهرت كميّة ادوات كتيرة جداً متعددة المهام والاستخدامات عشان تساعد البيزنيس وتسهّل عليهم تحليل البيانات، خلّيني اقولك بس اهم الخطوط الرئيسية او العريضة في الموضوع ده الاول:

١. لغة برمجة ار : ودي أداة التحليل الرائدة المستخدمة في الإحصائيات ونمذجة البيانات وده اللي بيقوم بتجميع وتشغيل انظمة كتيرة جداً ماك وويندوز وغيرهم.. واللي عن طريقه تقدر تثبت اي حزم او تطبيقات موجودة حسب السيستم اللي انت شغّال عليه.

٢. لغة بايثون: وده طبعاً مصدر مفتوح مبنية على لغة برمجة تساعة على القراءة والكتابة والتصحيح وكمان تساعد في خلق الماشين ليرننج (التعلم او التصوّر الآلي) وكمان نقدر نجمّعها على اي نظام اساسي بسيط زي سيكوال او قاعدة بيانات زي مونجو او جيسون.

٣. تابلوه بابليك: برنامج مجاني نقدر نوصله باي مصدر بيانات زي ايكسيل على سبيل المثال وبعدين نقدر نعمل عليه خرائط وانشاءات واشكال ولوحات ونقدر كمان تكون متحدثة لحظة بلحظة مع الموقع.

٤. كليك فيو: وده من اهم ادوات معالجة البيانات في الذاكرة وسرعة تسليمها وكمان يقدر من خلاله نقدر نقوم بضغط البيانات حتى تصل الى ١٠٪ بس من حجمها الطبيعي.

٥. ساس: وده لغة برمجة بتساعدك على سهولة التوصيل وتحليل البيانات من اكتر من مصدر للداتا زي ايكسيل، اوبين ريفاين .. وغيرهم.

توهت مني مش كده؟ انا عايز اقول ايه؟

عايز اقول ان فيه كتير ادوات او اساس مبني عليه الادوات والتحليل لو فضلنا نتكلم عليهم للصبح مش هنخلص اكيد .. بس انا اديتك امثلة بسيطة جداً لادوات وفي نفس الوقت مبادى مبني عليها تولز كتيييرة جداً دلوقتي كل واحدة من دول بتقوم بغرض معين نقدر نستخدمه في الداتا انالتكس.

وعايز اقول ان الداتا انالتكس مش متوقفة على تسطيب بيكسيل او على انشاء كاستوم ايفنت على بلاتفورم معينة .. الموضوع فعلاً يتخطّى ده بكتير .. وكمان بيختلف من بيزنيس للتاني يعني شغلك في الداتا وانت شغال في ويب غير لو شغال في موبايل ابلكيشن حتى الخطوات في ده غير ده خالص .. وحتى لو شغال في ويب بيفرق شغال في ايكومرس ولا سااس ولا خدمي ولا ايه بالظبط .. كل حاجة بتختلف طريقة تشغيلها وطريقة تفكيرك نفسها في تعريف وتجميع وتحليل البيانات دي.

معلومة سريعة عن انواع البيانات

خلّوني اقولكم معلومة سريعة في موضوع تعريف البيانات ده .. فيه نوعين رئيسيّين مينفعش تبقى بتتكلم او بتقرأ في تحليل البيانات ومش عارفهم الا وهم .. الكمّ والنوع .. البيانات الكمّية والبيانات النوعية! تعرف الفرق بينهم اكيد صح؟ خلّيني في عجالة اقولك الفرق لان ده هيفرق حتى في طريقك تعريفك للبيانات بعد كده..

البيانات الكمّية هي اي معلومة يمكن قياسها كمّياً يعني ببساطة نقدر نجمعها او نجيب متوسّطها … الخ. زي ايه الارقام والنوع ده من البيانات بنستخدملها تحاليل احصائية عشان نقدر نطلع منها بمعلومات تفيدنا في اتخاذ القرارات.

البيانات النوعية هي بيانات او معلومات لا يمكن قياسها ولكن يمكن وصفها زي الكلمات او المسميات .. والنوع ده يمكن تحويله لبيانات كمّية ولكن بتكون غير دقيقة وبتكون نسبية وبتختلف من شخص للتاني ومن بيزنيس للتاني.

دي صورة كده توضّح الفرق بينهم سريعاً..

"تقدر تتابعني على لينكدان هنا او فيسبوك هنا عشان لو حابب تقرأ اكتر عندي او لو عندك اي استفسار بخصوص الميل ده او اي ميل هييجي ليه علاقة بتحليل البيانات"

يعني اعمل ايه؟

عشان تعمل تحليل فعّال لازم يكون تحليلك قائم على الجمع بين البيانات الكمّية مع النوعية لان كل نوع منهم فيه مميزات وعيوب ولكن عيوب كل نوع بيحلّها مميزات النوع الاخر.. وخليني اقولك رغم اختلاف طريقة عمل الداتا وتحليل البيانات ولكن كله بيشترك في ٣ اهداف او خطوات رئيسية:

١. جمع البيانات .. انك بشكل او باخر لازم تلاقي طريقة لجمع البيانات دي اصلاً وانك تعرّف نفسك والتيم والتولز ان دي ايفنتات لازم نقراها حسب طبيعة البيزنيس زي ما قولنا فوق.

٢. تخزين الداتا .. اززاي هتقدر بعد ما تجمّعها تخزّنها بالشكل الملائم لطبيعة البيزنيس ويكون تخزين بشكل يخلي البيانات دي قابلة للقراءة والفهم.

٣. عرض الداتا دي سواء بقى في تقارير او اشكال او حتى ارقام بس كده بشكل يكون قابل لفهمه واتخاذ القرارات بناء عليه ويكون ملائم لاحتياج البيزنيس اللي انت شغال عليه.

لسه عايز تشتغل في تحليل البيانات؟

دلوقتي اعتقد انت عرفت مين هو الداتا اناليست ووظيفته ايه؟ ببساطة اقدر اقولك هو الشخص المحترف في تحليل وعرض البيانات بشكل قابل للفهم والقراءة عن طريق تطبيق تقنيات وادوات مع بعضها لجمع البيانات المعلوماتية اللي من خلالها نقدر نطلع بمؤشرات وافكار يقدر البيزنيس على اساسها ياخد قرارات بس كده ياراجل؟ امال انت فاكر ايه!  طب ليه عقّدتها فوق؟!😀

انا معقدتهاش انا كنت بشرحلك ان الموضوع مش بسيط وفي نفس الوقت مش مستحيل! محتاج مذاكرة ومجهود ومحتاج منك تكون ذكي وفرّاك والموضوع فعلاً ببساطة وبنفس الخطوات كده 

١. أخذ معلومات حول موضوعات محددة (بما فيهم البيانات المخفيّة)

٢. ثم تفسير وتحليل.

٣. ثم تقديم النتائج في تقارير شاملة.

لو عرفت تعمل اللي فات ده مبروك عليك انت كده بقيت محلل بيانات بس انا عارف انك زي حالاتي مبتحبش المستوى العادي وعشان كده حبيت اقولك انك عشان تتميّز في مجال تحليل البيانات لازم تتعلّم شوية حاجات تانية زي ايه؟ بص يا سيدي:

الاحصاء والتقارير الاحصائية وتبقى عارف الادوات الاحصائية وكيفية استخدامها.

تنظيف الداتا .. زي ما قولنا البيانات اللي بتيجي بتبقى كتييييرة جداً ومليانة حاجات مش مهمة فالشاطر هنا انه يقدر ينضفّها ويجيب البيانات اللي يبني عليها باقي الماشين بتاعته.

تحليل البيانات الاستكشافية .. يقدر يستكشف اصلاً البيانات المهمة من غير ما يتم توجيهه ولو فيه بيانات مهمة الشركة مش بتبص عليها يقوم هو بتوجيه الشركة ليها.

داتا فيزوالايزيشن - عرض مرئي للمعلومات يعني يقدر يعمل تقرير مليان اشكال والوان وحركات تسهّل عالقارئ او متخذ القرار فهمه للتقارير دي.

واخيراً وليس اخراً لو تقدر تزوّد على كل ده وتتعلّم ماشين ليرننج ساعتها انت هتبقى بتغرّد وحيداً بعيداً عن باقي الناس في المجال ده.

اعتقد طوّلنا صح؟ 

كنت عايز اقولكم كمان اهم ١٠ ادوات مهم تتعلّمهم في ٢٠٢٤ لو انت مهتم تدخل مجال تحليل البيانات ولكن خلوها بقى للميل اللي جاي ان شاء الله.

فوتكم بعافية.