محدش بيدخل حرب وهو مش مستعد

محدش بيدخل حرب وهو مش مستعد

تفتكر لو عايز تستعد للحرب محتاج ايه يكون معاك ك باور؟

في كتاب فن الحرب ل صن تزو بيقولك 

كل الحروب بتعتمد على الخداع. يعني لما تكون قادر تهاجم, لازم تظهر كأنك مش قادر؛ ولما تستخدم قواتك, لازم تبان كأنك ساكت؛ لما تكون قريب, لازم تخلي العدو يفتكر انك بعيد؛ ولما تكون بعيد, لازم تخليه يفتكر انك قريب

المعنى من الاقتباس ده في سياق تحليل البيانات هو إنه بيبرز أهمية امتلاك معلومات ورؤى أفضل ممكن ما يكونش عند المنافسين. تحليل البيانات، زي تكتيكات الحرب، كتير بيعتمد على فهم وتوقع الأنماط والسلوكيات قبل ما يبقوا واضحين للآخرين.

وهنا كل واحد اكيد دلوقتي جه في باله سوبر باور معينة نفسه يمتلكها للحرب دي اللي نفسه يطير واللي نفسه يختفي وبما اننا بنتكلم عن سوق الاعمال والبيزنيس فهقولكم ان افضل قوة خارقة حقيقية وتقدر على ارض الواقع تمتلكها بجد وتبقى سوبر هيرو حقيقي هو التحكم وقراءة الداتا بشكل صحيح. لو ده حصل في اي بيزنيس انت شغال فيه هتكون سوبر هيرو حقيقي والاب الروحي ليهم كمان!! وساعتها هيبقى صعب الاستغناء عنك والى الابد.

مين مش عايز يمتلك سوبر باور؟

لو نفسك تبقى سوبر هيرو حقيقي في مجالنا وتتخطّى كل اللي حواليك ويبقى ليك السبق في قرارات مصيرية حقيقية صحيحة مفادها زيادة الارباح او تحقيق جروث او حتى تفادي خساير كبيرة يبقى انت في المكان الصحيح وتابع بقى معانا السلسلة دي عشان هنقول كلام كبير على قد السوبر باور اللي انت المفروض هتكتسبها او هتكتسب طريقها من خلال السلسلة دي معانا…

القوة دي هنجيبها منين طيب؟ 

بص يا سيدي انت كـرجل خارق هتستمد قوّتك دي من حاجة كده اسمها داتا او ما يطلق عليها البيانات والفكرة هنا مش في الداتا بس على قد ما في طريقة جمعها وطريقة سردها وشرحها وطريقة تحليلها واستنباط المعلومات منها عشان تقدر من خلاله تبني قرارات تفيد البيزنيس او الشركة افادة حقيقية وانا من واقع تجربتي بقولك كل مرّة هتصيب مفيش ولا مرة هتجلّي معاك نهائي وساعتها هتبقى السوبر هيرو بتاعهم.

خلّونا قبل ما ندخل في الموضوع نرجع خطوتين ورا بس ونبدأ من البداية خالص عشان الناس كلها اللي تقرأ تبقى مستوعبة الموضوع ونبقى كلنا واقفين على نفس الأرض ومحدش بس يتوه منّنا في النص وطبعاً قبل ما نتكلم عن اي حاجة في الدنيا لازم نبقى عارفين احنا بنتكلم عن ايه؟ وايه اهمية الحاجة دي وكلام كده هيساعدنا ندخل في عالم الداتا بسهولة وباختصار شديد عشان اللي عارف ميزهقش 😉

كل ده وبتتكلم عن الداتا؟ طب ما الداتا كتيرة اهي!

سامعك وشايفك وهجيبك على فكرة، بادئ ذي بذء ايه هي الداتا؟ هل هي بيانات في المطلق؟ لا الداتا هي البيانات المعلوماتية او البيانات اللي اقدر اطلع منها بمعلومة وبالبلدي خالص وببساطة شديدة هي الارقام اللي نقدر نجمعها عن اي بزنس واللي من خلالها نقدر ناخد اكشنز وقرارات … وانا بحب اوصف الداتا  بالـ جي بي إس اللي من خلاله بقدر احدد موقعي فين واشوف النقطة او المكان اللي عايز اوصلّه وهو بيرشّحلي طرق كتيرة فيه الطرق الاطول مسافة بس أسرع وقتاً وفيه العكس وفيه طرق هو مش بيقراها لازم انت تجبره على انه يشوفها ويمشّيك فيها نفس الكلام في الداتا فيه طرق واضحة للكل وظاهرة وانت وحظك وفيه طرق مستخبية لازم انت اللي تجيبها وتجبر السيستم بتاعك انه يقراهالك عشان تبقى بياناتك ادق واسرع واقل تكلفة سواء وقت او مجهود وتقدر تبني عليها قرارات افضل بكتيير.

عرفت المقصود بالداتا وبعدين؟

وبعدين عشان اقدر اقرأ البيانات دي لازم اقفشها واجيبها قدامي في شكل قابل للقراءة والفهم والقياس فكلمة اقفشها دي هي ما تعرف بالتراكينج .. ايه الداتا تراكينج: هي تتبع الداتا اللي قلنا عليها فوق او بمعنى اشمل مجموعة من العمليات اللي من خلالها تقدر تظهر بيانات محدده عشان نقدر نستفيد منها ونتخذ قرارات استراتيجية تفيد البيزنيس اللي شغالين عليه..

طيب بعد ما تتبّعنا البيانات واهي بقت كتيرة وموجودة في كل مكان .. هنا بقى الشاطر هو اللي يعرف يستغلّها صح ويقراها مظبوط ويجمّعها بطريقة وبكيفية وبكمّية صحيحة عشان يبني عليها التنبؤات والقرارات بتاعته. وهنا اللي يفرق شخص عن التاني هو تحليله المنطقي والصحيح للبيانات دي وخلّونا نقف شوية عند الكلمة دي تحليل البيانات يعني ايه تحليل البيانات؟

وقبل ماقولك يعني ايه خلّيني اقولك هي ليه دي اهم نقطة في الموضوع كله لان ببساطة شديدة تحليل البيانات بيلعب دور مهم جداً ورئيسي في تحسين اعمالك تحسين واضح للجميع يتلخّص الدور ده في  اربع محاور رئيسية : جمع البيانات والرؤى المخفيّة - انشاء التقارير - اجراء تحليل السوق - وتحسين متطلبات البيزنيس.

"تقدر تتابعني على لينكدان هنا عشان لو حابب تقرأ اكتر عندي او لو عندك اي استفسار بخصوص الميل ده او اي ميل هييجي ليه علاقة بتحليل البيانات"

طب ما الداتا سهلة اهي!

طيب من الكلام اللي قولناه ده اعتقد انت شايف الداتا سهلة والموضوع بسيط لكن يا صديقي خليني اقولك ان الموضوع ليس بالبساطة التي تبدو عليها انت كده اعتقد عرفت معنى مصطلح تحليل البيانات: خليني اقولك مرة كمان باختصار شديد هي التقنيات المستخدمة لتحليل وتفسير البيانات لتعزيز وتعظيم الانتاجية ومكاسب البيزنيس يعني ايه برضو يعني بيتم استخراج البيانات دي من مصادر مختلفة وبيتم تنظيفها وتصنيفها لتحليل الأنماط السلوكية المختلفة وطبعاً بتختلف التقنيات والأدوات المستخدمة وفقًا للمنظمة أو الفرد.

وعشان اللي قلناه ده كله، وباختصار شديد لو انت فاهم البيزنيس اللي شغال فيه وعندك القدرة على استخراج البيانات المعلوماتية بشكل صحيح وكمان تقدر تقوم بتحليل البيانات الاستكشافية لجمع المعلومات المطلوبة اللي من خلالها تقدر تفيد البيزنيس او الشركة فمبروك عليك انت دلوقتي سوبر هيرو الشركة والموضوع بالمناسبة مش سهل خالص محتاج مذاكرة وقراءة جيدة للبيزنيس وفهم متطلباته واتقان القوة الخارقة اللي قلنا عليها وده لو تعلمون عظيم ولو كان سهل كان الكل عمله بس دي فرصتك عشان تتميز وتمتلك قوة خارقة حقيقية.

طيب بعد ما عرفنا كل المصطلحات وفهمنا يعني ايه داتا وايه التحليل ايه بقى الادوات والـتولز المستخدمة في المجال ده؟ ده اللي هنقوله المرة الجاية بامر الله ..  متستعجلش كل حاجة هنقولها بالتفصيل الممل وهنساعدك كمان تبقى متمكّن من السوبر باور دي اللي مش كتير يقدر عليها ولكن هنكتفي بهذا القدر المرادي عشان الناس متزهقش وهنكمّل في المرّات القادمة ان شاء الله 

فوتّكم بعافية.