أفضل 10 أدوات لتحليل البيانات تحتاج إلى معرفتها في عام 2024

طبعاً بعد ماعرفنا الاساسيات عن الداتا .. 

عايز اقولكم ان كلمة "البيانات" موجودة من زمان جداً بس مكانتش بنفس اهمية الوقت الحاضر .. خصوصاً في عصر يتم فيه إنشاء 2.5 كوينتيليون بايت من البيانات يوميًا، 

فتباعاً ومع الكمّ المخيف ده دلوقتي البيانات وتحليلها بقى ليهم عامل مهم وحاسم في اتخاذ القرارات زي ماتفقنا.

بس اززاي تفتكر ممكن تتعامل مع كمية البيانات دي كلها؟؟ استوعبت الموضوع؟ 

كم هائل من البيانات يومياً في كل صناعة على حدة فالبيزنيس بتاعك مهم يبقى على اطّلاع دائم بالبيانات اللي تهمه داخل الصناعة اللي هو بينافس فيها اياً كان نوعها 

وعشان كده بقى دور محلل البيانات دور حيوي ومهم جداً في كل الصناعات والشركات باختلاف احجامها وطريقة شغلها. وطبعاً محلل البيانات مش هيقعد يعمل كل حاجة بنفسه لازم يعتمد بشكل كبير على ادوات تسهّل عليه عملية جمع وتنظيم وتحليل البيانات زي ما عرفنا كده في الوظائف الرئيسية بتاعته قبل كده. 

وعشان كده خلوني اتكلم واشيّر معاكم في الميل ده أفضل 10 أدوات لتحليل البيانات. هي الحقيقة من أهم الأدوات او التولز اللي لازم يتعلّمها كل محلل بيانات محترف او حابب يفرق عن اللي حواليه خطوتين تلاتة في ٢٠٢٤ السنادي وهقولك كمان عن ملخص سريع لكل اداة وكمان ايه اهم الشركات اللي بتستخدمها عشان لو منشّن على شركة وحابب تشتغل معاهم فيها تبقى عارف الادوات اللي بيستخدموها وتذاكرها كويس 😉

١. لغة برمجة ار و بايثون 

دول من أهم لغات البرمجة اللي بنسخدمها في مجال تحليل البيانات. ار هي أداة مفتوحة المصدر تستخدم للإحصائيات والتحليلات، انما بايثون هي لغة بنفسّر بيها عن طريق كتابة جمل واكواد تساعدنا في تحليل البيانات. والمنتجين دول الاتنين تقدر تنزلهم من على مواقعهم الرسمية مجاناً وبسهولة جداً.

الشركات اللي بتستخدمهم:

لغة ار على سبيل المثال لا الحصر شركات زي جوجل وفايرفوكس.

لغة بايثون بيستخدمهم على سبيل المثال برضو شركات زي فيسبوك و نيتفيلكس ويوتيوب وغيرهم من الشركات اللي بتتعامل وبتجمّع كم كبير وهائل من البيانات.

٢. الاداة العبقرية ميكروسوفت ايكسيل (او بديله جوجل شيت)

من الاخر مينفعش تشتغل في تحليل البيانات وانت متعرفش تتعامل مع الايكسيل او جوجل شيت انا بعتبر ده بمثابة اساسيات تحليل البيانات اصلاً بالرغم من ان الايكسيل مش مقتصر على شوية جداول ومعادلات او حتى بايفوت تيبل او الجداول المحورية بس لا الموضوع ابعد من كده بكتييير فعلاً على سبيل المثال لا الحصر الماكروس اللي من خلالها تقدر تتعامل مع العمليات المتكررة والموضوع دلوقتي طبعاً بقى ابعد مع دخول الذكاء الاصطناعي اللي تقدر دلوقتي تربطه بالايكسل وعيش معاهم.

لو هنتكلم عن الايكسيل كمنتج فهو مملوك لشركة ميكروسوفت وبيقدم منتجات لتلت فئات وطبعاً كان بينزل منه اصدارات بشكل شبه سنوي وفيه فيرجن منه اونلاين برضو ولكن يبقى الاوفلاين فيرجن هو الافضل.

الشركات اللي بتستخدمه في مجال تحليل البيانات:

من اهم الشركات اللي بتستخدمه بشكل يومي تقريباً هي ماكدونالدز و ايكيا وماريوت وغيرهم كتير

٣. تابلوه

من اكثر ادوات تحليل البيانات شيوعاً تستخدم لتصوير وعرض البيانات بشكل مبسّط وسهل جداً. وانا استخدمته بشكل شخصي في اكتر من بيزنيس وعايز اقولك من الاخر بدل ما تقعد تنقش البيانات في جداول او غيره دي بتختصر عليك الوقت وتستغل وقتك في تحليل الارقام والاداء واتخاذ القرارات بشكل اسرع فمش هتضيّع وقت اطول في تنظيم البيانات دي وعرضها وطبعاً من مميزاتها سرعة التحليل ولوحات تحكم كاملة وطبعاً الموضوع سهل جداً مش صعب انك تستخدمه وتبدأ في انشاء لوحاتك وتقاريرك عليه.

الشركات اللي بتستخدمه في مجال تحليل البيانات:

طبعاً تابلوه بيقدموا منتجات كتيرة تقدر تطّلع عليها وتعرفها وتذاكرها ولكن الشركات او المؤسسات اللي بتعتمد عليها بشكل كبير في تحليل البيانات زي مثلاً شركة اودي للسيارات وسكايب و سيتي بنك وغيرهم.

٤. رابيد ماينر

من افضل الادوات اللي تم الاعتماد عليها مؤخراً وادراجها تحت اهم ادوات تحليل البيانات واللي من خلالها تقدر تعالج بياناتك بشكل سريع ومتطوّر يعني هي عبارة عن منصة تعالج البيانات ونقدر نبني نماذج التعلّم الآلي ونشره من خلالها وطبعاً بيتم استخدامها في البيانات واسعة النطاق او بالبلدي كده البيانات الكبيرة جداً وبتيجي من اماكن مختلفة او مصادر مختلفة.

الشركات اللي بتستخدمه في مجال تحليل البيانات:

من اهم الشركات اللي بتستخدمها هي شركة بي ام دابليو للسيارات و سانوفي وغيرهم.

"تقدر تتابعني على لينكدان هنا او فيسبوك هنا عشان لو حابب تقرأ اكتر عندي او لو عندك اي استفسار بخصوص الميل ده او اي ميل هييجي ليه علاقة بتحليل البيانات"

٥. نايم

الاداة الخمسة وهي كونستانز انفورميشن ماينر وتعرف باسم نايم وهي اداة مجانية ومبنية على نظام مفتوح المصدر لتحليل البيانات وإعداد التقارير والتكامل بين البيانات وطبعاً اغلب استخدامه بيبقى بيانات ورسومات وده بيقدّمه من خلاله منتجين اساسيّين: نايم اناليتكس و نايم سيرفر

نايم انالتكس بتستخدم لتنظيف البيانات وجمعها وتظبيطها كده وجعل البيانات دي قابلة للاستخدام مع كل الاشخاص او الجهات المعنيّة وكمان تقدر تعمل من خلالها مسارات عمل للبيانات دي عشان تقدر تفسّرها تفسير منطقي.

انما النايم سيرفر فدي منصة تستخدمها المؤسسات عشان تنشر سير عمل علوم الداتا وتقدر من خلالها كمان تظبط الاتمتة بتاعتك او ما يطلق عليه بالعربي الاوتوميشن 😀

الشركات اللي بتستخدمه في مجال تحليل البيانات:

من اهم الشركات .. شركة سيمانس و نوفارتس وكونتننتال وغيرهم.

٦. باور بي آي

ده يعتبر تاني اداة مملوكة لشركة مايكروسوفت في مجال تحليل البيانات ودي طبعاً اغلبكم عارفها بنستخدمها عشان ننشئ تقارير متطورة وتصورات تفاعلية للبيانات من الاخر هي من افضل الادوات في عمل فيجواليزيشن للداتا بتاعتك وبشكل جميل وسهل وفي نفس الوقت بروفيشنال جداً.

الشركات اللي بتستخدمه في مجال تحليل البيانات:

بتستخدمه اغلب شركات متعددة الجنسيات زي ادوبي - ورلد سمارت - هيثرو وغيرهم.

٧. اباتشي سبارك

دي من اكتر الادوات تعقيداً شوية ولكنه مهم جداً جداً عشان هي عبارة عن إطار عمل حوسبة عنقودية وكمان بيبقى مفتوح المصدر بنستخدمه عشان نعالج البيانات لحظياً في الوقت الحالي او الفعلي بيعتمد اكتر على البرمجة وعشان تقدر بسهولة تتعامل مع الاخطاء في البيانات عندك.

الشركات اللي بتستخدمه في مجال تحليل البيانات:

من اهم الشركات اللي بتستخدم الاداة دي: اوراكل هورتون وركس - وفيزا وقلنا بيستخدموها عشان يحسبوا البيانات بتاعتهم لحظياً في الوقت الفعلي ليها مع سرعة معالجة البيانات وكمان سهولة الاستخدام بالنسبة للشركات دي.

٨. كليك فيو

الاداة دي مختلفة شوية عن الباقي عشان هي ذاتية الخدمة في ذكاء الاعمال وتحليل البيانات وكمان تصور البيانات دي يعني نقدر نستخدمها في التنبؤ بالبيانات المستقبلية وبتساعد بشكل كبير جداً على تسريع الاعمال عن طريق التنبؤات دي وكمان مقارنتها بعد كده بالبيانات الفعلية وكمان خاصية تكامل البيانات.

الشركات اللي بتستخدمه في مجال تحليل البيانات:

الاداة دي موثوقة من قبل اكتر من ٥٠ الف عميل حرفياً ومن اشهر عملائهم شركات زي سيسكو - وسامسونج وغيرهم.

٩. تاليند

الاداة دي واحدة من اقوى الادوات اللي بيتم استخدامها في عمليات اي تي ال (اي = اكستراكت او استخراج) (تي = ترانسفورم او تحويل) (ال = لود او تحميل) فهي من اهم ادوات استخراج وتحويل وتحميل البيانات او الداتا ومن اهم اهدافها الرئيسية غير اللي قولناه ده هو جودة البيانات بنقدر ننظم وننظّف البيانات من خلال الاداة دي وعشان كده هي تعتبر من اكتر الادوات في تحليل البيانات اللي بيتم استخدامها لتحليل المخاطر.

الشركات اللي بتستخدمه في مجال تحليل البيانات:

بتعتمد عليه شركات ناشئة وشركات متعددة الجنسيات زي الدو - يورو نيكست - استرا زينيكا وغيرهم.

١٠. سبلانك

بيتم استخدام الاداة دي بقى في البحث عن البيانات اللي تم انشائها آلياً وكمان تحليلها و عرضها في شكل فيجوال وبيتم استخدامه اكتر في المجالات التقنية يعني واللي بيبقى فيها اكتر البيانات الآلية.

الشركات اللي بتستخدمه في مجال تحليل البيانات:

من اهم الشركات: لينوفو و انتل و اوتّو جروب وغيرهم.

ماذا بعد؟

بعد ما عرفنا اهم ادوات تحليل البيانات واللي لازم تبقى عارفهم عالاقل معرفة سطحية في ٢٠٢٤ خلّونا نتكلم عن التحليل التنبؤي ولكن نخلّيها في الميل القادم بامر الله عشان منطوّلش عليكم.. وعايز اقولكم معلومة صغيرة بس مهم جداً الكلام اللي بنقوله هنا ده في البداية بس عشان تبقى معايا معاك البيز واساسيات المجال وبعد كده هنتكلم قدّام عن التطبيقات العملية والتراكينج والسيرفر سايد والداشبوردز وكل حاجة بأمر الله ولكن خلّوها واحدة واحدة بالتسلسل اللي انا مجهّزه ليكم هنا عشان يبقى اقصى استفادة وصدقوني هتدعولي في الاخر.

فوتكم بعافية.